ازاي تقدري تتخطي أعراض ما قبل الحيض

التعامل مع أعراض ما قبل الحيض من أكثر الحاجات اللي مش بتفضلها اي ست. حوالي ٩٠ ٪ من النساء بيعانوا من أعراض من أول التقلصات حتي الرغبة الشديدة في أكل الشوكولاتة. أكدت الابحاث ان باهتمامك بصحتك من جميع الجوانب، تقدري تقللي من الأعراض و تخلي حياتك أسهل. عن طريق اضافة حاجات بسيطة في أكلك و روتينك هتحسي بفرق كبير في دورتك الشهرية. سورس بيوتي هتقولك علي أهم الاضافات لدورة أسهل و تعب أقل.

التمارين

كلنا عايزين نوصل لجسم مثالي، بس مش صحي انك تمارسي تمارين شاقة بالذات في اول يومين في الدورة. لو انت مش غاوية يوجا أو مشي. الأبحاث أظهرت ان التمارين عامة بتقلل أعراض ما قبل الحيض و الدورة كمان. التمارين بتخلي الجسم يفرز الاندورفينات (هرمون السعادة) و دا بيقلل المشاعر السلبية زي الاكتئاب و التوتر اللي بيبقوا موجودين اثناء فترة ما قبل الحيض

النوم

منقدرش ننسي أهمية النوم أثناء الدورة جسمك محتاج راحة. بننصحك انك تنامي من ٧-٩ ساعات. لو مرهقة أثناء اليوم تقدري تاخدي قيلولة سريعة ٢٥ دقيقة بعد الغدا، هتساعدك تكملي يومك و تستعيدي طاقتك.

شاي الأعشاب

شرب أنواع معينة من شاي الأعشاب ممكن يفرق كتير في تحسين أعراض ما قبل الحيض. شاي الأعشاب بيزيد من فرز مادة الجليسين في الجسم و دا بيشتغل كباسط للعضلات. فلو انتي بتعاني من تقلصات مؤلمة أو وجع في الضهر، فشرب شاي الأعشاب هيكون مفيد في تخفيف الأعراض دي

دريم كاتشر من سكند نيتشر

يحتوي دريم كاتشر علي الكاموميل اللي بيقلل التقلصات و يرخي الجسم اشربيه بالليل هيساعدك تحصلي علي ليلة من النوم العميق.

شاي الچنسينج من امتنان

الچنسينج هو من الأعشاب الصينية بيساعد علي تحسين أعراض الدورة و بيخفف من آلام المعدة و تقلصات الدورة.

الڤيتامينات و المكملات

ڤيتامين ب٦

كل ست لازم تاخد ڤيتامين ب٦ لقدرته علي تحسين المزاج و تقليل التوتر. كمان بيحميكي من الانيميا و بيساعد تغذية الخلايا بالأكسچين.

ڤيتامين ب١٢

هو عنصر فعال في الصحة العقلية، و يعتبر من أهم الڤيتامينات. هيخليكي مركزة و منتبهة و بيحافظ علي سلامة الخلايا العصبية و خلايا الدم وبكده لازم يبقي جزء من روتينك، مش بس أثناء الدورة. احرصي علي أكل المأكولات الغنية بڤيتامينات ب، زي السلمون، الأوراق الخضراء و البيض سيساعدك تناول هذه الأطعمة يوميًا على الشعور بالنشاط والحفاظ على صحة جسمك.

المغنيسيوم

هو باسط طبيعي للعضلات هيساعد علي تقليل التقلصات و المغص و كمان هيساعد علي نوم أفضل. المغنيسيوم موجود في الشوكولاتة الغامقة اللي لازم تضيفيها لأكلك أثناء فترة الأعراض لتخفيفها.

ڤيتامين د

نقص ڤيتامين د في الجسم بيسبب التعب و الصداع النصفي، و للأسف بتزيد الأعراض دي أثناء الدورة لو انتي مش بتتعرضي لشمس كتير يبقي لازم تاخدي ڤيتامين د كل يوم. خليكي دايماَ متابعة مستوي الڤيتامينات في جسمك مع طبيبك علشان تعالجي أي نقص أول بأول.

الكالسيوم

القلب و الأعصاب و العضلات محتاجين كالسيوم علشان يقوموا بوظيفتهم بكفاءة كويسة كمان الكالسيوم مهم جدا للعضم شرب اللبن و أكل الزبادي هيساعدك تحافظي علي مستوي الكالسيوم في جسمك. لكن لو عندك نقص لازم تستشيري طبيبك علشان تبدأي تحصلي علي مكملات.

لكل اللي بيعانوا من الصداع النصفي أو الاجهاد أو تقلب المزاج، بننصحكم تضيفوا الكالسيوم للقائمة بتاعتكم

ڤيتامين إي

هو مضاد للأكسدة قوي و بيحمي الثديين من الالتهابات و بيخفف من وجع الثدي أثناء الدورة.

 

*نرجو استشارة الطبيب قبل تناول أي من هذه المكملات*

 

مشاركة تعليق