جدول رمضانى ونصائح للعناية ببشرتك

رمضان هو أكثر شهر فى السنة اللى خلاله كلنا بننشغل فيه بالعبادة وعائلاتنا ومطبخنا. وبنحاول دايما نحقق معادلة صعبة ما بين تجميع العائلة وشغل المطبخ اللى مبيخلصش . وكمان لو بنشتغل الموضوع بيكون مش سهل تماما التعامل معاه. و طبعا وسط كل ده بننسى نفسنا ومش بنلاقى وقت كافى للعناية بنفسنا وبشرتنا. عشان كده جمعنا شوية نصائح هتساعدنا كلنا نلاقى وقت لنفسنا وسط اليوم اللى مبيخلصش, للمداومة على الروتين البسيط والاهتمام ببشرتنا. اقرئى المقال ده  وحاولى تلتزمى بالجدول المقترح عشان تحافظى على بشرتك فى رمضان, وتستقبلى العيد ببشرة صحية

فور الاستيقاظ:  اغسل الوجه بمنظف مناسب، وامسحي البشرة بالتونر ومتنسيش الكريم مرطب.

منتصف اليوم: ضعي ماسك مغذِي للبشرة زى مثلا قناع العسل والزبادي لمدة عشرين دقيقة، وكملى شغل بيتك، بعدين اشطفيه وجففي البشرة، وكمان ضعي سيروم مغذي مناسب لكِ.

بعد الإفطار: امسحي البشرة بقطنة مبللة بالتونر، و حاولى تشربي مشروب ينعشك و ارتاحى شوية بعد تنظيف المطبخ وكمان ضعي شرائح من الخيار على عينيكِ، أو كمادات من البابونج المثلج بقطعة من القطن النظيف على العينين للتخلص من الهالات والانتفاخات.

منتصف الليل: رطبي شفايفك قبل السحور بفترة، استخدمي كمية قليلة جدا من القهوة لتقشير شفايفك ، أو خليط من السكر والعسل ودلكى شفايفك بحركات دائرية بعدين اشطفيها وجففيها وضعي مرطب أو فازلين.

قبل السحور: اغسلي البشرة بالمنظف، وامسحهيا بالتونر أو ماء الورد، بعدين ضعي السيروم الليلي أو الكريم المغذي، أو طبقة من زيت جوز الهند النقى لتغذية بشرتك وترطيبها طوال الليل.

  أخيراً، إهتمي بتناول إفطار وسحور غني بالفيتامينات والمعادن لتعويض اللى بيفقده الجسم خلال فترة الصيام، وحاولى الابتعاد عن الحلويات، المخللات، والوجبات الغنية بالدهون. شرب المياه كمان هيفرق فى رطوبة البشرة، و تقليل الجفاف عشان كده متنسيش تشربي على الأقل  ٨ أكواب من المياه  ما بين الإفطار والسحور. متهمليش الرياضة، لأنها هتحفّز الدورة الدموية وهتساعد على حرق الدهون وإزالة السموم بشكل سريع. خلى جنبك دايما كريم مرطب لليدين لاستعماله بعد غسل المواعين لتجنب جفاف ايديكى. كمان خلال شهر رمضان بنضطر كتير  لوضع المكياج، حاولى وقتها  يكون ماكياجك هادئ  دون أي مبالغة، فمثلا لو هتستخدمى كريم الأساس حاولي وضع كميات قليلة مع توزيع جيد، ولإخفاء آثار الإجهاد ضعي الكونسيلر حول العين، و بودرة خفيفة، وبلاشر زهري ناعم ، وتفادي تحديد العين بشكل قوي … رمضــــان كريــــم

مشاركة تعليق