٥ علامات لأقتراب دورتك الشهرية

بيجي علينا كل شهر كام يوم بنشعر بتغيير فى الموود و المزاج العام. أحياناً كمان بشرتنا بيظهر عليها إجهاد. غير التعب المفاجئ للجسم والكسل الغير مبرر. كل دى علامات بتنبهنا أن دورتنا الشهرية قربت جداً. جمعنا لك بعض العلامات اللى ممكن تظهر لك قبل فترة الدورة الشهرية. كملى قراءة المقالة دى عشان تعملى حسابك ومتتفجأيش!.

١- ظهور البثور

من أبرز العلامات هى ظهور الحبوب على البشرة. وده بيرجع لتقلب وتغير هرمونات الجسم وبالتالى بتتسبب فى جعل البشرة مائلة للدهنية و تسبب إنسداد المسام و ظهور البثور.

٢- رغبتك في تناول الحلويات

هتحسي بنهم و جوع شديد للحلويات… ده طبيعي متقلقيش! حاولى بقدر الأمكان إنك تسيطرى على الكميات والتحكم فى الوقت اللي هيتم تناول الحلويات فيه للحفاظ على وزنك. بننصحك بتناول السكريات الصحية زى التمر/البلح و الفواكه بكميات معقولة.

٣- التعب

دورتنا الشهرية بتكون مؤلمة وبتشعرنا بالتعب والأرهاق الشديد والخمول. متقلقيش لو شعرتي بالنعس معظم الوقت. حاولى تنظيم شغلك و مهامك قبلها بفترة قصيرة عشان تعرفى ترتاحى وقت التعب و تنامى جيداً وقت قدومها وخاصةً بليل.

٤- الحساسية الزائدة

هتلاحظى تأثرك بأبسط الأشياء و تغيير مزاجك العام للأسوء… ممكن تبكى… ولا يهمك, فترة وهتعدى! التقلبات المزاجية والعاطفية دى معروف عنها أنها بتبدأ في التأثير عليكي قبلها بأسبوع وعادةً بتختفي بعد يوم أو يومين من بدء الدورة الشهرية. هتساعدك ممارسة الرياضية في تخفيف التقلصات وإفراز الإندورفين، وهي مواد كيميائية تشعرك بالراحة وتوازن هرموناتك المتغيرة.

٥- التقلّصات

هي أكثر أعراض الدورة الشهرية شيوعاً. بتحدث بسبب تقلص جدار الرحم ومحاولة التخلص من البطانة الداخلية للرحم. معظمنا بيعاني من التشنجات في أسفل البطن أو الظهر إما قبل أو أثناء فترة ال PMS ولكنها تصبح أقل ألم مع تقدمنا في السن. نظراً لأن غالبية السيدات يضطررن للتعامل مع التشنجات، فهناك مجموعة من الحلول المتاحة والعلاجات السريعة زى تناول الأدوية أو استخدام أكياس الماء الساخنة على أسفل الظهر أو المعدة. ننصحك أيضاً بأخذ حمام ساخن وتجنب الكافيين والملح.

مصدر الصورة: Pinterest

مشاركة تعليق